CONVOCATIO

DE VIRIBVS LATINE LOQVENTIVM CONIVNGENDIS

Cum ALF propositum sit cuiuis incepto fauere quo litterae Latinae et ueterum Romanorum cultus ciuilis cognitio augeatur et diuulgetur, nihil antiquius nobis est quam ut omnes ad hoc studio conspirantes collatis consiliis et uiribus rem communem aggrediamur.

Qua re omnes greges, Circulorum moderatores uel huiuscemodi sodalitates idem sentientes ad XI Congressum uocamus, ut, praeter orationes et acroases, etiam uias et rationes in medium ponant, quibus ipsi arctius Academia uinciantur et constringantur.

Hoc uel magis est in uotis, quippe cum altero huius anni semestri Finnia, unde ALF praeses Tuomo Pekkanen, Europae rursus praefutura sit nobisque plurimum emolumenti afferre possit.