Nicolai Sallmann relatio

De Academiae Latinitati Fovendae Conventu XI

Conventus ALF undecimus celebratus est inde a d. 23 ad d. 28 m. Iulii a. 2006 in Hispania professoribus Iosepho Maria Maestre et Ioachimo Pascual Barea Gaditanis auguribus. Argumentum praecipuum fuit Qualis fuerit activa linguae Latinae institutio a saeculo XIV usque ad nostram aetatem.

Rem satis difficilem professores supra memorati Eduardo Engelsing adiutore susceperunt; elegerunt enim locum, ne dicam loca, admodum longe a patria peregrinorum distantia: oppidum Alcannizium in provincia Aragonia et municipium Ampostam ad ostium Hiberi fluminis in provincia Tarracone; praeterea accessus aerius per aeriportum Barcinonensem ab illis locis magno spatio aberat. At angustiis itinerandi - etiam participantibus haud raro molestis - fortiter feliciterque superatis conventus optime et non sine fructu evolvebatur. Pretia, etsi hospitibus praeter vecturas (plerumque aerias) deversoria erant solvenda - nam dormitoria studentium non suppeditabant - satis modica videbantur, praesertim si spectas commoda liberaliter praebita: convivia postmeridiana et vespertina copiose in cauponis vicinis praebita, concentum musicum a grege cantantium Alcannizii dulcibus cantilenis recitatum, lustrationem antiquae Tarraconis a Ludovico Pignol scite et luculenter expeditam, vecturam autocineticam per oram maritimam Ampostinam et paludes avibus marinis gratas in delta Hiberi. Nolo oblivisci sonorum hilarium, quibus ultimus dies a grege musico CFK quartet finitus est.

Quod attinet ad studium scientificum, copia 36 orationum et relationum (,acroaseon') provocavit magnam audientium virtutem vigilantiam vivumque ingenium, sed magno cum praemio magnoque fructu domum dimisit centum illos, qui attenti aderant. Quantum video, quattuor distingui possunt disciplinae (inter se mixtae), quarum prima tractavit argumentum praecipuum conventus, i. e. didacticam linguae Latinae per sex saecula:

Laurentii Vallae (+ 1457) Elegantias Latini Sermonis vere eleganter Eustachius Sánchez-Salor comparavit cum Francisci Sanctii Minerva, quae docuit liberiorem Latinitatis usum. Villelmus du Cassé in memoriam revocavit Petrum Mosellanum Protegensem confirmasse sermonem vivum optimam esse scholam et linguae et morum Christianorum, ut eluceret e Progymnasmatis Latinis. Iam maiore venustate Bartholomaeus Bravus S.I. in Enchiridio suo dialogis simplicibus hominum simplicium demonstravit habilitatem Latinitatis ad vitam cotidianam describendam, ut egregie expediit Ioachimus Pascual Barea. Aloisius Miraglia, vir facundissimus, varias docendi methodos humanistarum singillatim percensuit inde ab Erasmo, Ioanne Sturmio, Ioanne Caselio, Petro Ioanne Perpiniano, Ioanne Posselio, G. V. Gravina, Iacobo Facciolatio, G. D. Vossio, Gottl. Heineccio, I. A. Gesnero, I. L. Vivesio aliisque eo consilio, ut eorum opinionem de significatione verborum imaginibus, tabulis pictis etc. in institutione Latina inquireret. Eiusdem Miragliae discipuli Robertus Carfagni et Arturus Tabaku ratione vere moderna, scilicet photographematis figurisque pictis radiatore in linteum pro-iectis, scholam Italicam Novi Vivarii ante oculos ponere conabantur. Iesuitarum methodum docendi demonstravit Michael de Albrecht, ALF sodalis, exemplo libri Vulcani S.I., qui in-scribitur Sagata Pallas, nunc demum cum commentario edendi. De Bohemi Ioannis Amos Comenii ratione vere moderna instituendi Andreas Fritsch, ALF sodalis, locutus est.

Comenio enim persuasum erat linguam Latinam exemplar et quasi clavem esse ad alias linguas discendas. Cetera pertinent ad varios conatus, quomodo Latinam linguam his temporibus nostris Latine loquendo docere possimus. E.g. Schola Nova in Belgio ante XI annos condita, quae Latinitatem methodo Assimil libelli Clementis Desessard proponit, commendata est a Carolina Thuysbaert. Eiusdem autem scholae conditor et musagetes Stephanus Feye non didacticam, sed Hermetismum miris sententiis patefecit, quae non omnibus erant intellegibiles. Res Mexicanas rettulerunt Maria de Lourdes Santiago Martinez et Maria Patricia Villasenor Cuspinera: ibi linguam Latinam necnon Hispanicam una cum Christianismo et cultu occidentali pedetemptim ab Europaeis inductas adhuc ad finem concordem non esse perductas. Aliter Theresa Santamaría Hernández gavisa est de Latinitate vivo colloquiorum commercio instituta in Hispanica academia Albasitensi. Similia nuntiavit Milena Minkova, ALF sodalis, de America: magistris in Civitatibus illis Unitis licere methodum quamlibet inferre, dummodo a discipulisparentibusque acciperetur, quippe qui scientiam subitam praeferrent lentae sollertiae loquendi. Titicae Aslanidou relatio de lingua Latina haud aliter docenda ac linguae hodiernae docentur, in absentia eius a Demetrio Koutroubas recitabatur. Normam agnitam Latinitatis Terentius Tunberg, ALF sodalis, voluit elocutionemque Ciceronianam non strictam certe, potius aliqua libertate mollitam; at semper adhiberetur pronuntiatus restitutus, non Vaticanus! Magis magisque certamina Latina ad linguam fovendam utilia esse docuit Horatius Antonius Bologna exemplo certaminis cum Hoeufftiani, tum Capitolini, deploravit eorum cladem pecuniis deficientibus effectam, laudibus extulit asylum illud ultimum litterarum Latinarum recentissimarum. Denique A. Gratius Avitus Londiniensis linguam Latinam per interrete divulgandam esse contendit. Iam nunc in academia virtuali Thule (www.academiathules.org.test/index) res Romanae imaginibus pictis (formis Asterigianis) et Latinitas strenue propagantur methodo Nova Roma oblata. De serietate unusquisque ipse secum iudicet!

Vt cyclus didacticus concludatur, mentionem facio Colloquii Magistrorum, quod Eduardus Engelsing convocaverat et moderatus est. Intererant colloquio Ioannes Cienfuegos, Aemilius Canales Muñoz, Antonius González Amador, Virpi Seppälä-Pekkanen. Actum est de novis rationibus quibus alumni sermone Latino erudirentur.

Didacticis argumentis fusius descriptis reliquas disciplinas raptim percurram. Secunda di-sciplina spectabat ad indolem et auctoritatem linguae Latinae. Loquebatur Iosephus Maria Maestre Maestre, sodalis ALF, de controversiis inter Franciscum Sanctium Brocensem (De non loquendo Latine) et Henricum Iason Salmanticensem, Diana Johnson de praeexercitamentis in institutione Latina Washingtoniana, Dominicus Viain de vocabulis facete fictis in versionibus fabularum hodiernarum necessariis (e.g. in Harrio Potter Latino), Paulus López López de terminologia philosophica tam in Graecitate quam in Latinitate adhibita, Vincentius Cristobal de etymologia Latina in sermone Hispano adhibenda, Nicolaus Sallmann, ALF sodalis, de prosodia Latina interdum nimium neglecta, Nicolaus Fedorov de ludorum scaenicorum Latinorum emolumento didactico. Gaius Licoppe, ALF sodalis, recognovit totam historiam ALF, Victorius Ciarocchi recitavit epistulas Latinas ab amicis suis et fautoribus Latinitate inflammatis missas. Vibeca Roggen, ALF sodalis, defectum studiorum in Norvegia classicorum deploravit.

Tertia disciplina ad litteras Latinas spectabat. Fervidissme Valafridus Stroh, ALF sodalis, poetas Monacenses saec. XVII laudavit recitavit explicuit. Ratione academica Ioannes F. Alcina poesin Latinam Tarraconensem saec. XVI tractavit. Theodoricus Sacré, ALF sodalis, Iusti Lipsii renovationem poeseos classicae magna dignavit laude. Ludovicus Charlo Brea de ratione Don Quixote fabulae vertendae meditatus est. Michael Sitjar i Serra protraxit libros memoriales Rivispullensium, i.e. civium oppidi Ripoll. Eduardus Engelsing vituperavit Quintiliani neglegentiam linguisticae et psychologicae scientiae. Tuomo Pekkanen, ALF praeses, de musica in institutione Latina adhibenda locutus novum disculum compactum partes Kalevalae Latinae canticis exhibentem auditorio stupefacto ostendit.

Tamquam appendicem adiungo disciplinam quartam de rebus civilibus et cultu gentium. Demetrius Koutroubas, ALF sodalis, philosophatus est de humanitate Graeco-Romano-Christiana quam fundamentum democratiae habebat. Iosephus Closa Farrés de viribus naturalibus mundi physicalis ad Albertum Einstein usque peroravit, Iohannes Emanuel Blanch Nougués docuit artem iuridicam iurisconsulti Francisci Salgado de Somoza in concursu creditorum agendo.

Conventus Latinus internationalis talem diversitatem rerum vitare non debet, dummodo omnia et Latine et, fieri si potest, optima Latinitate recitetur. Gratiae agendae sunt institutoribus conventus, moderatoribus, oratoribus, necnon auditoribus, imprimis vero magistratibus et Alcanniziensibus et Ampostinis. Carolus Abril Navarro, Alcannizi oppidi praefectus, primarios quosdam academicos benigne recepit in curia; Ioannes M. Roig i Grau, Ampostae urbis praefectus, et Antonius Sabate, illius regionis rector culturalis, professores et magistros in opere Latinitatis fovendae pergendo confirmaverunt. Insuper ipsi verba sua Latine recitaverunt. Vtinam idem fiat in ea natione, quae ad XII conventum Academiam invitabit!

Magno cum plausu praesentium Antonius Capellán Garcia gregi Latino consociato tradidit Acta Selecta Conventus ALF anno 2002 Matriti habiti, volumen vere admirabile, quod ipse una cum coniuge Lola sive Maria Dolores Alonso Saiz ediderat. Inde spes orta est. Speramus fore, ut huius quoque conventus symbolae potiores simili volumine edantur.

Relationem conscripsit Nicolaus Sallmann Moguntiacensis, ALF sodalis, m. Novembri MMVI.